Meistaradeildin

Jæja...drátturinn fyrir Meistaradeildina var gerður nú í morgun. Þar gefur að líta nokkrar mjög athyglisverðar viðureignir.

AC Milan - Bayern

Þau áttust einmitt við í 16 liða úrslitum í fyrra þar sem Milan hafði betur samanlagt 5-2 að mig minnir...Bæði lið hafa verið að spila frekar illa heimafyrir. Milan er í 6.sæti heimafyrir, reyndar voru dregin stig af þeim í byrjun móts, þannig að það hefur tekið þónokkuð úr þeim. Bayern er hinsvegar í 4.sæti, en hafa reyndar verið að spila betur og betur eftir að Ottmar Hitzfeld tók aftur við þeim.

 PSV - Liverpool

Held að allir poolarar séu nokkuð ánægðir með þennan drátt. "Minnsta" liðið af liðunum átta. Slógu reyndar út Arsenal, en það er nú svosem ekki erfitt þegar Henry er ekki heill. PSV er á toppnum í Hollandi og Liverpool í 3.sætinu á Englandi. Ronald Koeman, þjálfari PSV, kannast nú reyndar vel við Liverpool, og enska andstæðinga, en Benfica, sem Koeman þjálfaði á síðasta tímabili, sló einmitt út Liverpool og Man Utd. Einnig slógu Ajax út Arsenal í riðlakeppninni þegar Koeman var þar við stjórnvölinn, en það var reyndar áður en nýja fyrirkomulagið á Meistaradeildinni kom, þá voru engin 16 liða úrslit. 

 Roma - Man Utd

Spennandi leikur. Roma slógu út það lið sem margir töldu geta farið alla leið, og það nokkuð óvænt, Lyon. Man Utd áttu frekar "létta" viðureign við Lille, þótt þeir hafi ekki spilað nógu vel í seinni leiknum. Man Utd eru efstir í deildinni heimafyrir og Roma í öðru sæti. Man Utd getur enn náð þrennunni þetta árið, og ef litið er gaumgæfilega í það hvernig leið þeirra lá í úrslitaleikinn þegar þeir náðu þrennunni árið 1999 gefur að líta ýmislegt skemmtilegt. Þá voru engin 16 liða úrslit, en andstæðingar Man Utd í 8 liða úrslitunum þá voru Inter, frá Ítalíu. Roma er einnig frá Ítalíu. Í undanúrslitunum árið 1999 lentu þeir gegn Juventus. Þeir geta einmitt lent gegn ítölsku liði í undanúrslitunum núna, ef þeir komast þangað, en það gæti orðið Milan.

Chelsea - Valencia

Ætti að verða áhugaverð viðureign. Chelsea sló fyrrum lærisveina Mourinho, Porto, út í 16 liða úrslitum, meðan Valencia skreið framhjá Inter. Þetta gæti hinsvegar reynst mikil heppni fyrir Chelsea menn, þar sem líklegt verður að teljast að einhverjir leikmanna Valencia verði dæmdir í bann eftir slagsmálin undir lok leiksins gegn Inter.  Valencia geta þó reynst skeinuhættir, en þeir hafa tvisvar komist í úrslitaleikinn á þessum áratug, tapað í bæði skiptin, gegn Real Madrid og Bayern Munchen.

 

Undanúrslitaleikirnir verða svo:

Chelsea/Valencia - PSV/Liverpool

Roma/Man Utd - Milan/Bayern